【車迷觀點】以防你唔知嘅上車系列 車仔今夏確定加盟嘅球員 Part.1
25/26 球季就快完，出面其他球隊嘅球迷，而家應該日日篤住部手機，等緊轉會大神 Fabrizio Romano 講Here We Go，一係就已經換咗國家隊波衫等睇世界盃。
但我哋車路士球迷嘅體驗可以話截然不同。因為喺 BlueCo 嗰套無止境儲幼幼嘅政策下，我哋根本唔需要等轉會窗開，一早已經有一堆確定咗今夏會嚟報到嘅期貨。
不過老老實實，車路士呢兩年買人嘅數量同速度，真係多到連部份死忠嘅球迷都好難記清楚晒。以防大家唔記得咗我哋其實買落咗幾多件貨，趁住而家季尾轉會窗開之前，等我同大家溫下書。
呢張 List 入面嘅人，有幾個我都曾經喺過去一年嘅【借車月報】度同大家一直有跟進嘅人。今次加埋數據同入球率，入肉探討一個最現實嘅問題：呢班新面孔下季返到嚟史丹福橋，到底有無掟企？定係擺明返嚟影張相、打個卡，就會再次被掟入外借大軍？
邊路嘅最強挑戰者： Geovany Quenda (昆達)
如果大家有睇開我嘅【外借報告】，對昆達呢個名絕對唔會陌生。呢位 19 歲嘅葡萄牙天才今季喺士砵亭直頭係複製緊上年二安嘅劇本，由季初令人期待嘅超級後備，火速進化成士砵亭嘅其中一個核心，最難踢嘅硬仗全部由佢擔正。雖然佢喺 12 月嘅打吡戰中不幸遭遇骨折重創而要休養，但車路士一早當佢係寶，專登安排專屬團隊喺倫敦幫佢復康兼適應生活。
睇返數據，呢位左腳踢右路嘅逆足翼鋒最恐怖嘅地方，係佢遠超同齡球員嘅球商同傳球創造力。場均助攻高達 0.52 次，預期助攻（xA）亦極之誇張；佢唔止有極佳嘅視野、爆發力同射手應有嘅門前嗅覺，11 月防守端數據仲要翻倍，由場均鏟斷 0.8 次倍增至 1.81 次，場均奪回控球權更高達 5.67 次，攻守兩端嘅存在感都非常強。
之前有唔少球迷擔心，昆達返嚟會同現有球員塞車。但隨住新帥沙比阿朗素正式以大權在握嘅「Manager」身份上任，左右路嘅戰術藍圖已經完全唔同晒。
沙比套 3-2-5 陣式根本無傳統純翼鋒嘅位置，佢極度依賴兩隻翼衛去負責整條邊路嘅寬度，甚至要內收做 Playmaker。昆達喺士砵亭一早已經打過翼鋒同翼衛，佢極強嘅爆發力、推進力同傳球視野，簡直係為沙比呢套體系度身訂造。
但當然，我係極端地諗沙比唔用4後，就算係4後陣式中昆達都絕對會佔一席位。
昆達嘅到來，絕對係右路「完美嘅戰術補充」，完全有能力直接同一隊球員競爭。
1.95 米粗糙原石：Emanuel Emegha (艾美加)
講完昆達，第二個要睇嘅，係身價同爭議度一樣咁高嘅中鋒艾美加。呢位 1.95 米嘅荷蘭高佬喺史堡嘅表現，只能用「大起大落、天使與魔鬼嘅混合體」嚟形容。當佢在陣時，佢嘅頂級射門嗅覺同衝擊力，的確係球隊嘅進攻命脈；但佢場外嘅IQ同EQ就令人R 頭，曾經公開講過「以為自己效力嘅法國球會喺德國」、又係輸波之後話唔關自己事等等，結果引發公關災難兼被內部停賽，心智成熟度令人擔憂。
睇數據，艾美加絕對係一個數據極端嘅怪物。佢喺法甲進攻效率好驚人，場均入球高達 0.82 球，預期進球（xG）亦有 0.80 球，頭槌同射門把握力都係頂級。但魔鬼部份一樣咁得人驚，佢場均觸球只有 21.68 次，成功傳球更只有可憐嘅 8.80 次，兩個數字加埋就話你知佢係一個極度依賴隊友餵波嘅純終結者，一旦中場被切斷，佢就會完全隱形，缺乏自行回撤接應或者單兵突破嘅能力。加上佢肌肉傷患頻繁，喺高強度肉搏下嘅身體管理亦面臨考驗。
依家車路士陣容入面最缺嘅，偏偏就係一個正宗柱躉。艾美加雖然有 1.95 米嘅身高，但以沙比阿朗素過去嘅用人選擇嚟睇，戰術定位存在暫時嚴重錯位。
艾美加返到嚟史丹福橋，隨時連 Locker 都未放嘢，就會面臨被借走，或者高價套現、賣走去市場換即食即戰力嘅危機。
總結：
講完昆達同艾美加，我夠膽話佢哋係兩個極端，一個係沙比體系裡面嘅完美配件，一個定位尷尬充滿問號。但今夏上車名單仲有兩位，一個係大家等足成年嘅 Panda 仔，一個係啱啱 BBC 官宣、直接解決車仔最大嘅坑。彭達斯同巴高嘅分析，拆開咗做收費文章，有時間記得睇埋。
連結係度，下篇再傾。
【車迷觀點】以防你唔知嘅上車系列 車仔今夏確定加盟嘅球員Part.2
https://cfc9up.com/p/2627-tw-part2
========================================
Facebook 同 主頁 已經開咗啦！如果鍾意我的文章可以入嚟按個讚！
⭕️ 車迷狗up天地 ❌
https://www.facebook.com/cfc9up
本文亦同步刊登於我的主場：
如果想第一時間收到新文通知，或者支持我繼續寫車路士長文，可以到 cfc9up.com 免費訂閱。