【車迷觀點】車仔連續四季心口開天窗 唔係有型亦唔係我哋唔稀罕
隔離小編話，車路士無心口贊助根本無問題。我哋唔等錢使，亦唔稀罕為咗區區幾千萬鎊賤賣心口，呢啲叫做皇者風骨。
嗯，講得好，同意啦。哪次不同意？
唔？做咩仲碌落嚟？
想我逐點反駁？無喎。
人哋鍾意點樣支持車路士，甚至想將件無Logo波衫裱上牆放喺屋企神檯拜，我哋都無權阻止。純粹隔空駁火，除咗幫對方呃多幾個Clicks，對理解件事亦無乜幫助。
但當「連續四季搵唔到長期心口贊助」被包裝成「車路士根本唔稀罕」，件事就唔再只係審美或者撐唔撐球會嘅問題。
車路士個心口究竟值幾多錢？短約等待高價，係精明策略定商業部門交唔到功課？少咗幾千萬鎊收入，係咪真係無傷大雅？今夏仲可以破紀錄買人，又證唔證明車路士根本唔等錢使？
呢幾條問題，先值得我浪費大家網絡資源。
我唔盲反，但市場更加唔識盲撐
澄清先，我唔係因為隔離小編支持A，就包拗頸一定要支持B。球會做得啱，我自然會撐；做得唔好，我亦無理由幫佢背書。一路走來始終如一。
講返呢單，車路士並唔係完全無人想贊助。
自從「3」喺2022/23球季完約，Infinite Athlete、DAMAC同IFS都曾經將Logo印上車路士心口。問題係，Infinite Athlete去到2023年9月底先落實；DAMAC只係包辦2024/25球季最後一段；IFS亦係2025/26下半季先頂上。連續三次都只係短期填位，去到2026/27，車路士仍然未能將管理層心目中嘅價錢變成一份長期合約。
管理層嘅盤算其實唔難理解。既然車路士認為自己個心口值每年6,000萬至6,500萬鎊，與其低價簽五年鎖死未來收入，不如先用短約頂住，等待成績、曝光同品牌價值回升。
第一年咁做，叫策略；第二年繼續等，仲可以話有耐性。第三年世冠盃奪冠咁型棍，想再搏一次高價，我甚至理解點解佢哋咁心雄。
但去到第四年，變咗車路十，答案仍然係「等緊一份符合眼緣嘅合約」，咁就要問：究竟要等到幾時？
商品值幾多，從來唔係賣家自己嗌出嚟。你可以話層樓值二千萬，堅持少個崩都唔賣；但如果連續四年無人肯用二千萬接貨，就係市場話你知，你個叫價同現實之間有段距離，唔會突然讚你有風骨。
車路士唔係唔出名，只係一直無人肯用高層想要嘅價錢簽長約。所以件事唔係我哋唔稀罕心口贊助，係市場一直唔願意出我哋開出嗰個價。
如果跟 The Sponsor 最新估值係£33.6m，比車路士叫價接近低一半，原因亦好直接：上季英超第10，今季無任何歐洲賽。車路士自己就仍然認為接近£50m，但無論採用邊個估值，都支持唔到「價值連城，所以唔屑收錢」呢個童話。
買到摩根羅渣士，只係證明張卡仲碌到
隔離篇文其中一個最大論據，係車路士用破英國球員轉會費紀錄嘅1.17億鎊買入摩根羅渣士。嘩，既然仲有錢轟落去買人，區區心口贊助，事撚但啦。
呢個講法最大問題，係將「有能力使錢」同「唔需要收入」撈埋一齊。
換個講法你就明問題喺邊：俾你好叻叻碌卡買架Tesla，只能證明你Quota好多同張卡未爆，唔代表你份糧突然變得唔重要。正因為你每個月供多咗架車，先更加需要份糧準時出。
車路士買摩根羅渣士，只證明球會有方法完成交易。可能係賣人套現、現金流安排，亦可能係管理層願意預支未來成本，但無一樣會令每年幾千萬鎊商業收入突然變成唔需要。
會計上，1.17億鎊亦唔會喺簽約一刻成筆塞入同一季陣容成本。摩根羅渣士雖然簽咗七年，但英超規則規定新合約嘅轉會費攤銷最多只可以計五年。粗略計算，每年攤銷已經約2,340萬鎊，仲未計人工同經理人費用。
心口贊助則係每季直接增加嘅商業收入。兩者唔係逐筆一換一，但放入SCR條數，一邊增加陣容成本，另一邊就擴大容許你承擔成本嘅收入基礎。
所以摩根羅渣士唔係「車路士唔等錢使」嘅證據。
車路士唔等現金，但一定等收入
少咗一份心口贊助，的確唔會令車路士聽日即刻破產。艾巴利唔會突然要賣樓填數（睇落佢亦唔會），球會都唔會因為心口無Logo，就連韋碧克份人工都出唔起。
但問題從來唔係班美國佬銀行戶口仲有幾多個零，而係財務規則容許車路士將幾多錢放落陣容。
由2026/27球季開始，英超正式用SCR取代PSR。球員人工、領隊人工、經理人費用同轉會費攤銷，原則上只可以佔足球相關收入加球員買賣淨收益嘅85%。車路士如果踢歐洲賽，仲要同時遵守UEFA更嚴格嘅70%上限。
心口贊助正正就係商業收入。每年少咗幾千萬鎊，SCR條數下面嘅收入基礎自然會細咗，但球員人工同轉會費攤銷唔會因為件波衫靚而自動消失。老闆可以繼續泵水，但泵水唔等於收入，亦唔可以叫UEFA望住艾巴利個銀行戶口，感受到佢嘅皇者風骨之後放你一馬。
而呢個亦唔係酸民幻想出嚟嘅危機。車路士2024年嘅陣容成本比例高過當時80%上限，被UEFA罰咗1,100萬歐元；去到2025年，上限收緊至70%，車路士仍然超標。好消息係，UEFA確認條數有改善，所以今次總罰款降至300萬歐元，當中200萬仲屬有條件罰款；壞消息係，我哋已經連續兩年超標。
可能有人會話：「盤數班美國佬自然會搞得掂，幾時輪到你哋擔心？」
先答後半句。照呢套邏輯，領隊識排陣，幾時輪到你講戰術？球員識踢波，幾時輪到你鬧佢派膠？咁所有足球Page都可以執笠。
至於盤數，放心，我唔係擔心艾巴利今晚望住條數瞓唔着。佢哋最後當然會搵方法埋單，但「搞得掂」同「無代價」係兩回事。
就好似山齊士傳失波之後，有後衛趕返去護空門，最後無失分，唔代表山齊士頭先無派過膠。只係本來應該由龍門處理嘅問題，最後要由第二個人幫佢執手尾。
盤數都係一樣。賣多一個球員、少買一個、壓低人工、食罰款，全部都係埋數嘅方法，但無一樣可以證明收入缺口從來無存在過。真正要問嘅係，點解一個本來可以靠商業收入填嘅窿，要用其他足球資源補返？
代價未必戲劇性到令車路士買唔到下一個球員，可能只係少一份新合約嘅空間、需要賣多一個球員，或者本來可以留低嘅Buffer再薄一層。
無Logo嘅波衫可以好睇，短期拒絕平賣亦可以係策略。但策略有成本。你可以認為呢個成本值得俾，唔可以因為美國佬最後埋到數，就當佢從來無存在過。
當車路士本身已經貼住條界行，連續四季承受數以千萬計嘅收入缺口，就點都唔會叫做「無傷大雅」。
車路士可能真係唔等現金。
但喺SCR面前，佢一定等收入。
總結：份功課未交，唔代表我哋鄙視考試
寫到最後都要講返，我唔係想證明車路士窮到燶，亦唔係見到心口無Logo，就即刻拉定橫額要求艾巴利落台。
「仲有錢使」、「等緊合理價錢」同「連續四季無贊助完全無代價」，由頭到尾都係三件事。將佢哋撈埋一齊，再加句皇者風骨，唔會令每年消失咗嗰幾千萬鎊突然變成好消息。
真正要驗收呢個策略，唔係睇件波衫有幾型，亦唔係睇車路士仲碌唔碌到張卡，而係最後簽返嚟嗰份合約，對唔對得住呢幾年嘅等待。
短期留白可以叫企硬，連續四季留白，就係一份仍然未交嘅功課。到商業部門真係交到一份靚成績表，再講皇者風骨都未遲。
最後，純粹留低一段夜半感想。
呃Like、呃流量，邊個創作者唔鍾意？我都鍾意，仲成日自認寫文只係9up呃飯食。但如果要我為咗流量，將一套連自己都說服唔到嘅說話打出嚟呃Like，抱歉，我做唔出。
一篇文少幾個Like，最多咪沉，大把文無爆啦我；但寫低一套自己都唔信嘅說話，嗰啲字就會午夜夢迴纏繞住我。
呢條數，我更加識計。
========================================
Facebook 同 主頁 已經開咗啦！如果鍾意我的文章可以入嚟按個讚！
⭕️ 車迷狗up天地 ❌
https://www.facebook.com/cfc9up
本文亦同步刊登於我的主場：
如果想第一時間收到新文通知，或者支持我繼續寫車路士長文，可以到 cfc9up.com 免費訂閱。