【修迷觀點】修爾斯憑乜吸引香港人 講下90年代未成豪門嘅車仔
你無睇錯，今日唔係【車迷觀點】，係【修迷觀點】。因為今日我唔係車路士迷，係修爾斯迷。
「修爾斯……乜撚嘢呀？」
如果你未聽過呢個名，咁只係代表你好後生。翻查香港舊報紙，至少由70年代末去到1990年，香港報章仲會將Chelsea叫做「修爾斯」。
而嗰陣嘅修爾斯，同今日大家認識嗰支車路士亦差好遠。無油王、無摩連奴、無英超冠軍，甚至連穩定前列都講唔上。1979年香港報紙寫佢哋，標題係「三個月來初嘗勝利滋味」；1983年再出場，已經係「面臨存亡一役」。簡單嚟講，就係一支間中贏波都足以上新聞嘅普通英格蘭球隊。
但上一篇Bates爺文章出街之後，有位讀者留低咗一句幾有趣嘅說話：「因喜歡荷杜而關注車仔，後來其踢法變成車迷至今。」
呢句令我產生咗個疑問。
今日大家因為彭馬入坑、因為歐聯入坑、甚至因為玩FM太多入坑，都唔難理解。但90年代初，一支未長期贏波、未有世界級班主、喺香港報紙仲叫修爾斯嘅球隊，到底憑乜吸引一個遠在香港嘅人？更加奇怪係，荷杜幾年後就走咗，點解佢最後無跟住荷杜離開，反而留下做咗幾十年車迷？
於是，我決定暫時放低我哋熟悉嘅車路士，返去搵一搵嗰支已經消失咗嘅修爾斯。
修爾斯唔出名，但荷杜出名
而家開始睇波，通常係先睇到一支球隊，再慢慢認識入面啲球員。但喺90年代初，香港球迷認識歐洲足球嘅次序，隨時完全相反。
嗰陣無YouTube、無