【車迷觀點】賣車仔嘅 23.5 億鎊無郁過 油王同英國政府嘅四年零和博弈
每次喺公海一講起車仔前老細油王，下面啲留言實會出現幾句固定對白：「賣盤筆錢實俾英國政府食晒夾棍啦！」、「啲政客一早落晒格啦，仲使問！」
聽落好似好有道理，好符合大家對政治黑暗嘅幻想。但喺呢篇文重點唔係講陰謀論，所以收埋先。
由 2022 年 5 月車仔正式賣盤到依家 2026 年，足足 4 年，呢 23.5 億鎊（折合大約 230 幾億港紙）嘅淨收益，一直原封不動咁攤喺一個受英國政府極度嚴格監管嘅凍結戶口度鋪緊塵。無政客食到夾棍，連啲息都無人郁到一個仙。
點解幾百億擺喺度 4 年都未捐得出？今日，我呢個車迷唔係嚟吹奏油王有幾偉大，亦唔盲反英國政府有幾衰格。純粹用成年人嘅邏輯同客觀事實，同大家分享下，呢場無人肯退讓、連一蚊都未過到手嘅世紀消耗戰，到底背後玩緊咩政治嘢。如果你唔鍾意政治都唔緊要，因為呢單花生味都OK重，我都會講得輕鬆D。
第一回合：為咗幾隻字，230 億卡足四年
大家記唔記得 2022 年，油王被迫賣盤嗰陣，發過一張好體面嘅聲明？當時佢話，會將賣盤嘅淨收益，全部捐畀「烏克蘭戰爭嘅所有受害者」原文係寫住：All victims of the war in Ukraine。
聽落好有大愛，好符合左膠思想係咪？但麻煩就出喺呢幾隻字。
油王團隊條底線好簡單但好硬。佢哋嘅解讀係：「所有受害者」，當然唔只局限喺烏克蘭境內，仲可以包括逃難到歐洲各地嘅難民，甚至理論上任何因為場仗而受苦嘅俄羅斯平民。
英國政府（依家係施紀賢 Keir Starmer 話事）個立場好清楚：既然我哋係制裁你，咁呢筆錢就必須 100% 直接用喺烏克蘭境內嘅人道救援。對英國政府嚟講，成功迫到個俄羅斯佬賣球隊，如果由得一個受制裁嘅俄羅斯富豪去話事將筆錢用返係俄羅斯身上，佢哋點同西方盟友交代？
而最核心嘅死結係：油王律師團隊堅持「筆錢喺法律上依然係油王嘅」。我係「自願捐出嚟」，而唔係俾你英國政府當戰利品咁懲罰性充公，你英國政府無權指手畫腳教我點樣分。
一邊想攞光環當係制裁戰利品去派街坊，一邊堅持錢係我嘅，點捐由我話事。就係為咗呢個主導權嘅爭執，雙方僵持不下，搞到呢 23.5 億鎊喺戶口入面企定定喺度。
第二回合：魔法打敗魔法，油王嘅大愛反擊
英國首相施紀賢舊年尾見筆錢卡咗咁耐，就跳出嚟凶油王，落咗個最後通牒話時間無多，逼佢盡快簽字同意將筆錢淨係用喺烏克蘭。
大家以為油王會妥協？定係會發脾氣？都唔係，佢出咗一招極度高明嘅政治突襲。
根據《The Athletic》最新報導，油王團隊最近向英國慈善委員會申請成立一個全新嘅機構，名叫「衝突受害者基金會（The Foundation for the Victims of Conflict）」。
呢招一出，英國果邊嘅反應如下：
點解話係魔法打敗魔法？因為西方政客平時最鍾意企喺道德高地講大愛同人權，油王今次就用終極大愛嚟反將你一軍。佢個基金會話，筆錢唔應該淨係局限喺烏克蘭，而係應該用喺全球戰爭/衝突受害身上。世界上唔係淨係得一個地方打緊仗㗎嘛，中東、蘇丹、加沙啲難民唔需要幫咩？
為咗確保呢個道德高地企得夠穩，油王仲搵咗一班有頭有面嘅人做基金會信託人，包括咗：前聯合國副秘書長、前 UNICEF高層，全部都係國際人道救援界嘅頂級猛人。
油王將呢 23.5 億鎊交畀聯合國班猛人去審批點樣救濟全球難民。如果依家英國政府為咗面子而 Reject 呢個基金會，即係落聯合國面、話前 UNICEF 高層唔識做慈善，更會變成為狙擊油王而無視全球其他難民嘅冷血政客。
你想用道德綁架我？我就企上一個更高嘅神枱，用全世界嘅受害者反綁架你。睇下你英國政府點樣拆。
第三回合：醉翁之意不在酒，英國政府有其他目標
睇到呢度，你可能會問：油王既然一早講明呢 23.5 億鎊係要捐出去，點解仲要同成個英國國家過唔去？唔通真係純粹為面子、為啖氣？
喺頂級富豪同律師團隊嘅世界入面，無人會純粹為啖氣。真正嘅原因，隱藏喺《The Athletic》報導嘅尾段：澤西島皇家法院。
其實除咗車路士賣盤呢 23.5 億鎊之外，英國方面喺 2022 年 3 月，仲喺澤西島凍結咗油王高達 70 億美元（即係差唔多 540 幾億港紙）嘅龐大資產。
呢個先係整場大龍鳳嘅真正戲肉。
油王嘅律師團隊非常清楚，如果今次喺呢 23.5 億鎊嘅捐款上全盤跪低，任由英國政府將筆錢當成懲罰性充公去隨意分配，咁喺普通法體系下，就會開咗一個極度危險嘅法律先例。英國政府𡁻完你 23 億，日後大可以照辦煮碗，順理成章咁沒收埋佢喺澤西島嗰 70 億美元資產。
所以，呢場 23.5 億鎊嘅拉鋸戰，表面上係政客同富豪喺度拗點樣做善事先最啱規矩，但骨子裏，其實係油王為咗保住自己另外嗰 70 億美金資產所打嘅一場法律前哨戰。英國政府想攞光環兼食你 70 億；油王就寸土必爭，死守自己嘅法律底線。
總結：神仙打架，最慘嘅係邊個？
英國政府出最後通牒話時間無多，油王呢邊就完全唔急又打出一張聯合國大愛牌。呢筆 23.5 億鎊嘅善款，怕且都仲有排搞。
英國政府唔可以退讓，因為一退就等於向俄羅斯示弱，無面目見西方盟友；油王亦絕對唔會妥協，因為一跪低，就會開咗個危險先例，連帶失去澤西島幾百億身家。
結果呢？無論係烏克蘭捱緊炮火嘅平民，定係全球各地水深火熱嘅難民，至今連一個仙嘅麵包錢都未收到。
呢種荒謬，先係現代政治最真實、最諷刺嘅寫照。
作為車迷，呢筆賣盤遺產已經同我哋無任何關係。大家食完花生，都係乖乖地返去睇下 BlueCo 今個夏天又去邊個南美國家「販賣人口」，收購咩新尼馬好過啦。
========================================
Facebook 同 Threads 已經開咗啦！如果鍾意我的文章可以入黎按個讚！
⭕️ 車迷狗up天地 ❌
https://www.facebook.com/profile.php?id=61566593983419
鍾意我嘅文章，又有餘力支持我嘅話，記得去我Substack訂閱：
