【會員限定】CHELSEA THE ORIGIN EP2 戰爭、醜聞與溫布萊嘅凱歌 (1914-1945)
我哋上一集講到，車路士喺1914年一戰爆發之前，憑住創會時嗰套「金錢足球」同「娛樂至上」 DNA，已經成為倫敦最受歡迎、最有話題性嘅「娛樂大亨」。正當大家以為呢場派對可以繼續落去，1914年8月嘅炮火聲，就將成個歐洲拖入咗戰爭。
當浪漫嘅「娛樂大亨」遇上殘酷嘅現實，我哋呢間球會又會點樣應對？呢一集，就係我哋由1914到1945年呢三十年間，喺戰火中求存，經歷光榮、恥辱同重生嘅故事。
一戰風雲 (I)：史上第一次「軍人決賽」
戰爭一爆發，足球界即刻成為眾矢之的。媒體同議會猛烈攻擊，話班球員同球迷都係「逃避兵役者」(shirkers)，喺度逃避責任。面對呢種指控，車路士都好快用行動回應。
球會唔單止大力支持成立「球員營」(Footballer’s Battalion)，仲搞咗個「Footballs for Tommies」計劃，籌錢買靚足球，送俾前線嘅士兵。