【車迷觀點】安素之後到古古齊星散 轉會背後係一個爸爸嘅抉擇
噚日先寫完安素嘅嘢，今日就輪到古古尼亞。
事緣佢近日跟隨西班牙國家隊備戰，喺訪問度俾記者問到「如果有巴塞隆拿嘅報價會點」，佢答咗句「如果機會嚟到，好難拒絕」。結果各大外國傳媒即刻好似執到金咁，瘋狂出標題大造文章，話「古古承認巴塞難以拒絕」、「車路士再有核心暗示跳船」，搞到成個車迷公海又瘋狂屌高層同怪責球員無忠誠心。
睇返琴日安素嗰篇文下面嘅留言，老實講，雖然只係少數，但有幾句真係睇到覺得好刺眼：「老闆咁X樣正常都想走」、「呢件嘢點會養得熟」。我明大家嘅怨氣，輸畀 PSG 加埋高層混亂，好多球迷個心態已經去到一個草木皆兵嘅地步，覺得班球員一定會跳船星散、全車陷家富貴宇宙大爆炸世界末日。
但如果我哋下下都俾傳媒斷章取義嘅標題帶住行，將對高層嘅憤怒，轉化成對球員未審先判嘅惡意，咁樣睇波真係好悲哀亦違反咗我原意。
是其是，非其非。今日古古尼亞呢單巴塞傳聞，正正就係傳媒利用國際賽期加家鄉情懷炮製出嚟嘅流量陷阱。如果你有一直 Follow 我個 Page，或者記得我上季寫過關於古古尼亞大仔 Mateo 嘅故事，你就會發現：比起所謂嘅回歸母會，呢位爆炸頭戰士依家最渴求嘅，其實係一種標題黨永遠唔會理會嘅安穩生活。
魯營球場嘅家鄉題陷阱
今單嘢，要由背景開始講，點解古古尼亞會無啦啦講巴塞？因為今次西班牙國家隊嘅熱身賽，正正就係喺巴塞隆拿嘅魯營球場踢。
班加泰記者，對住一個 La Masia 青訓出身、喺度大嘅古古尼亞，問佢「如果有巴塞報價會點？」你叫佢點答？身為青訓產品，佢答一句「好難拒絕 (hard to refuse)」算係對母會最基本嘅尊重同客套說話。
但傳媒最核突嘅地方，係佢哋淨係 Cap 咗呢四個字。佢哋唔會話你知，古古尼亞後面仲補多咗幾句：「我同屋企人依家喺英國好開心」、「我仲有幾年先會考慮呢啲嘢」。呢種斷章取義，夾硬將一句客套話同PSG 輸波、車仔星散扯上關係，根本就係喺車迷嘅傷口上面灑鹽嚟換 Click rate。
我幫大家慳埋時間，原文如下：
“It’s not just me, I also have to think about my family... Right now I’m not thinking about that... I’m very happy there [at Chelsea], and so is my family. I’ll leave it for a few years from now.”
Football is important, but Family is everything
如果你仲係覺得古古尼亞養唔熟，或者你根本唔了解佢喺倫敦經歷過咩。
有睇開我哋 Page 嘅巴打應該記得，古古尼亞大仔 Mateo 有自閉症。當年佢啱啱由白禮頓轉投車路士，除咗要面對身價壓力同場上表現不穩，佢私生活更加係面臨崩潰。Mateo 當初適應唔到普通學校，日日喊、唔識表達自己，古古尼亞當時喺訪問講過，見到個仔咁樣，佢喺球場根本集中唔到。
直至佢哋喺倫敦搵到一間合適嘅特殊學校，有專家同醫療團隊幫手，Mateo 終於有明顯進步，古古尼亞嘅場上表現亦都係嗰陣時開始反彈。
試問一個經歷過咁大難關、幾經辛先喺倫敦為個仔建立起一個穩定、有支援、完整生活圈嘅爸爸，真係會為咗一句傳媒幻想出嚟嘅巴塞報價，就貿貿然帶住一個需要極度穩定環境嘅仔仔去重新適應？對於一個愛錫小朋友嘅爸爸嚟講，仔仔嘅笑容，至少喺呢刻遠比回歸母會呢啲童話式標題重要得多。
總結：請認清現實，唔好做傳媒嘅扯線木偶
所以我話，對於古古尼亞嚟講，佢講得出「我要為屋企人考慮」，正正就係因為倫敦依家係佢最需要留低嘅地方。
輸波，大家都有情緒；高層亂，大家都知。但唔該唔好因為自己嘅怨氣，就逢親見到啲 Content Farm 標題，就自動波覺得球員反骨、無情無義，要人哋全家都幸福。球員都係人，佢哋有合約、有家庭、更加有我哋未必睇到嘅生活難處 (例如叫…叫著人妖)。
國際賽期啲無聊炒作，大家真係睇完得啖笑就算。(正如彭馬去曼聯果單我甚至連想出文解釋嘅興趣都無……) 與其擔心呢班核心球員跳草裙舞，不如留返啖氣，等英超返嚟嗰陣，嗌大聲啲幫佢哋打氣好過啦。
btw，希望唔好俾我燈到季尾有咩大事件炒大鑊，真係迫到古古走人啦…
========================================
Facebook 同 Threads 已經開咗啦！如果鍾意我的文章可以入黎按個讚！
⭕️ 車迷狗up天地 ❌
https://www.facebook.com/profile.php?id=61566593983419
鍾意我嘅文章，又有餘力支持我嘅話，記得去我Substack訂閱：
睇完呢篇野真係大快人心 ，不過fb上見既仲係有一大群羊比人撚到傻狗咁😩