【車迷觀點】安素夾埋經理人出聲嚇車仔 各打50大板嘅懦夫遊戲
到我講安素。
早排寫文，回應咗另一位小編嘅文，其中一個留言幾深刻下：「篇文又係各打五十大板，使撚你出文寫咩on9。」
講得啱。平時如果淨係講啲和理非嘅嘢 (等等，和理非呢粒字好似好耐無講過…)、兩邊都唔敢得罪，咁的確係嘥大家時間。但係今次安素夾埋經理人搞出嚟呢單大龍鳳，絕對唔係和理非，而係下下見肉、板板見血。
英國傳媒（例如 BBC）將單嘢寫到好似車路士面臨世界末日、更衣室大危機咁。但喺打開包花生嘅包裝睇，呢單嘢根本唔係咩單方面嘅球星逼宮，而係一場雙方都揸住對方死穴、無人敢踩煞車嘅「懦夫遊戲」。
一邊係貪得無厭、錯判形勢嘅經理人團隊；另一邊係冷血無情、算死草嘅資本玩家。今篇文係直接嚟寫下呢兩架迎頭相撞嘅泥頭車，到底各自喺度盤算緊咩。
花生懶人包：阿根廷的風波
入正題前，循例俾個前情提要大家：安素早排返阿根廷踢國際賽，喺電視訪問度公然發皇馬夢，話自己好想住馬德里兼仰慕卻奧斯。領隊羅生同高層即刻做嘢，以越過紅線為由重罰佢內部停賽兩場（缺陣足總盃對維爾港同聯賽對曼城）。點知佢經理人柏斯托尼唔單止無幫手降溫，仲走出嚟發爛渣話處罰完全唔公平………
(響起OP)1
安素狂踩油門，經理人嘅算盤與錯判
OK，OP完咗，入正題。安素同佢經理人柏斯托尼依家聲就好大，一副「你哋無咗我唔得」嘅姿態。點解佢哋敢踩盡油門撞埋車仔度？
佢哋賭緊嘅，係車路士球場上嘅死穴。球隊喺歐聯俾 PSG 恥辱性踢出局，聯賽又輸俾愛華頓，士氣直插谷底，贏咗維爾港都救唔到幾多。經理人個如意算盤係：領隊羅生絕對承受唔起戰績大崩盤嘅代價。
如果雪藏安素搞到中場癱瘓、跌出前五，羅生實第一個俾人開刀。所以佢哋斷定，只要喺傳媒面前吠兩句話「想去皇馬」，球會高層為咗保住盤數同成績，最後實會驚死，乖乖地坐低屈服傾加薪或者減價放人。
聽落好似好有計？但經理人計漏咗最致命嘅兩點：時間同合約。
安素份合約係簽到 2032 年。皇馬老細佩雷斯精過鬼，現時皇馬中場又唔係極度缺人，要佢哋揼一億鎊出嚟幫你接火棒恐怕唔係易事？喺買賣主導權 100% 喺車路士手上嘅情況下，安素根本無資格跳草裙舞。
更重要嘅係，仲有兩個月就踢世界盃，如果安素依家為咗扭計加人工而玩罷踢、玩面阻阻，車路士真係將佢掉入去炸彈小隊，無態兼無波踢，你估佢仲保唔保得住阿根廷個正選位？
車路士係一間企業，佢哋有大把時間同你慢慢磨；但球員嘅黃金歲月就得嗰幾年。攞自己兩個月後嘅世界盃前途，去要挾一間揸住你 6 年合約嘅大財團？嗯，大概就係木木梟打固拉多咁，膽色呢樣嘢我認同你嘅……
車仔迎頭直撞，資本玩家嘅無情同死頂
睇完安素嗰邊，我哋望下另一架車：車路士高層。佢哋點解又敢踩盡油門迎頭撞埋去？
佢哋賭緊嘅，係資本主義最冷血嘅威力。喺 BlueCo 眼中，咩大牌球星都只係一項資產。你扭計？記唔記得史達寧同迪沙斯？只要你唔聽話，車仔高層眼都唔眨就將你掟入炸彈小隊。
車仔高層個姿態好明確：我哋連幾千萬嘅資產都夠膽直接報廢，你估我哋會怕雪你一個安素？合約喺我手，唔聽話就同 U21 操練操到 2032 年啦。
聽落車仔好似佔盡上風、立於不敗之地？但車仔高層望住盤數，背脊一樣標緊冷汗。
安素當初用咗 1.07 億鎊買返嚟，就算已經攤銷咗三年幾，依家嘅帳面值依然高達 6000 萬鎊。如果球會真係咁勇猛無限期雪藏佢，安素個身價就會插水式暴跌。萬一夏天真係要平賣（例如 4000 萬鎊放走），車仔喺會計帳面上就會出現巨大虧損，隨時搞到 PSR 穿大窿，下季直接扣分。
既然代價咁大，點解車仔都唔肯低頭減價放人，或者順攤啲加佢人工？
因為規矩大於一切。BlueCo 成個十年大計，就係建立喺「超長合約 + 低底薪 + 獎金制」之上。如果今次向安素屈服，個後果係災難性嘅。陣中仲有幾十個簽咗 7、8 年長約嘅小朋友，如果彭馬、卡些度佢哋見到「原來扭計就可以加薪/轉會」，個個排住隊叫經理人出嚟跳草裙舞，車仔成個薪酬結構就會即刻崩潰。
為咗長治久安，車仔高層只能夠硬住頭皮踩盡油門扮無情。就算帳面上可能要蝕大錢，佢哋都必須要攞安素嚟祭旗，話畀全隊聽：喺 BlueCo 嘅體制下，無人可以大過份合約。
各打50大板之際……
講到呢度，可能有人會幫安素抱不平：喂，古古尼亞之前咪一樣喺公開場合批評球會買人政策，點解古古無事，安素就要內部停賽兩場？車路士係咪雙重標準？
重點唔係講錯嘢，而係危機處理嘅態度。
古古知衰，明白家醜不出外傳，事後私底下同高層道歉，然後公開重申對車路士嘅承諾。反觀安素？佢選擇由得經理人柏斯托尼企出嚟同傳媒隔空開火，仲話個處罰完全唔公平。一個係知錯能改，一個係靠惡發難，羅生要揸正嚟做罰安素停賽係無可厚非。
最肉酸嘅係，經理人柏斯托尼同《The Athletic》做訪問嗰陣，一個唔小心露咗條狐狸尾巴出嚟。佢話安素值得比依家賺更多。原文咁寫：Deserves much more than he is currently earning.
咩仰慕卻奧斯、咩想去馬德里生活，全部都係經理人做出嚟嘅浪漫包裝。外界都猜測，成單大龍鳳嘅真正目的，就係因為車路士有可能會無歐聯踢，安素合約入面嗰啲獎金無晒，底薪又唔夠人哋球會開得高，所以咪發脾氣扭計要求加薪。
打完安素，另外嗰五十板，車仔高層絕對要硬食。
點解安素會變成一個眼中只有錢、無歐聯踢就跳草裙舞嘅僱傭兵？咪就係 BlueCo 自己個畸形制度搞出嚟囉。你將美式資本主義玩到極致，以為簽 8 年長約加低底薪就可以轉嫁風險？當你將球員當成金融產品、當成隨時可以掟入炸彈小隊嘅消耗品；咁調轉頭，球員將你當成純粹嘅提款機，有咩問題？
當球會本身都無人情味、淨係同球員講合約條款嘅時候，你憑咩要求球員同你講忠誠？安素今次反骨，正正就係 BlueCo 呢種將足球純粹數字化嘅冷血管理，反噬自己嘅最佳人辦。
總結：請交還你嘅臂章，做返個普通員工
《The Athletic》今個星期亦爆咗個內幕：原來安素由頭到尾都唔係球隊嘅正式副隊長，佢只係車路士高層分豬肉咁搞出嚟嘅「領袖小組」成員之一。
呢點真係可悲。車路士花咗十幾億鎊買人，成個更衣室仍然蜀中無大將，要夾硬發明一個充滿企業陣味嘅名詞叫領袖小組。安素無資格做隊長固然抵鬧，但高層買咗成堆人返嚟，居然連一個壓得住場嘅真領袖都搵唔到，呢個先係車路士球迷最悲哀嘅現實。
講返轉頭，既然安素陣營咁鍾意計數、日日發皇馬夢，咁就請佢交出副隊長個位，乖乖地做返個普通球員。
真係想走嘅，就請用表現去證明自己仲值嗰 1.07 億鎊，等皇馬真金白銀擺上枱幫你贖身；如果發覺走唔甩想留低，咁就收聲踢波，用場上嘅表現去證明自己喺中場係不可或缺。
呢場懦夫遊戲，兩架車都各自揸住對方嘅死穴，大家鬥命硬，睇下最後邊個驚死先踩煞車。無論最終係車路士屈服，定係安素低頭認錯，相信各大球迷今鋪食花生都食飽咗，記得叫阿媽今晚唔好煮你飯。
好啦，今篇文講到呢度，我煞先。
突發後記：出文前夕，有人煞車了
就喺準備出文之際，最新消息傳出：有人縮沙喇。
安素經理人柏斯托尼喺巴黎出席一個快遞公司宣傳活動嗰陣，突然 180 度轉軚，話安素已經向全隊同高層道歉。佢賴安素「得 25 歲仲細」、賴傳媒「斷章取義」。最好笑嘅係，經理人親口講出咗佢哋投降嘅原因：「安素仲有世界盃要踢，而且合約仲有 6 年，大家要一齊合作。」
好啦，呢場懦夫遊戲，安素陣營終於發現自己根本無籌碼，為咗自己嘅世界盃前途，只能夠死死地氣踩煞車。鬧劇暫時落幕，安素保住咗飯碗，車仔保住咗規矩，只係留低咗一地嘅花生殼……同炒咗車嘅我。
好啦，今集講到呢度，我都一齊煞制先。
========================================
Facebook 同 Threads 已經開咗啦！如果鍾意我的文章可以入黎按個讚！
⭕️ 車迷狗up天地 ❌
https://www.facebook.com/profile.php?id=61566593983419
鍾意我嘅文章，又有餘力支持我嘅話，記得去我Substack訂閱：
