【國際車戰報】國際賽車路士球員盤點 球會差但國家隊翻生係咩玩法
9 年無寫過，國際車戰報。但大家知唔知最慘係咩…？就係輸完波入國際賽期，球員係國家隊踢得唔錯…你先發現原來輸波唔係球員問題…而係…嗯，唔講啦。
Anyway，睇咗今個星期國家隊咁多嘅比賽，幫車迷們總結咗車仔球員係國家隊嘅表現，數字係做參考唔係全部，為免寫太長都省略咗篇幅~當係國際賽期送俾大家嘅禮物。
彭馬 (Cole Palmer) | 烏拉圭 1:1 英格蘭
⭕️ 上陣時間：34 分鐘 (後備入替)
⭕️ 創造絕佳機會 (Big chances created)：1
⭕️ 關鍵傳球 (Chances created)：2
⭕️ 傳球成功率：88% (15/17)
⭕️ 地面對抗成功率：67% (4/6)
❌ 傳中準繩度：40% (2/5)
34分鐘交足戲但決策惹火，彭馬幾時先肯醒？
車仔入國際賽期前恥辱性4連敗兼3場食白果，身為進攻核心嘅彭馬可以話係沉到落海底，一直交唔出表現。今場對烏拉圭，佢喺 56 分鐘臨危受命入替受傷嘅科頓，短短 34 分鐘內畫面感依然豐富：先係喺右路發難逼到烏加迪踩跌佢硬食黃牌；去到 81 分鐘，佢開出一個急勁嘅角球喺人群中穿過，間接造就賓韋治門前執雞打破僵局。
不過，呢啲亮眼時刻依然掩蓋唔到佢近期最大嘅死穴：臨場判斷。58 分鐘一次反擊，明明有機會直線傳俾拉舒福特，佢偏偏要拖慢節奏分去左邊破壞咗組織。難怪近期越來越多車迷批評佢：「個波唔停定就唔識踢」。只要比賽節奏一加快，佢決策猶豫、拖慢反擊嘅毛病就表露無遺。去到 90 分鐘，佢本來有一次單刀絕殺嘅機會，可惜又被出迎嘅門將梅斯利拿快一步化解，完全睇得出佢爭緊以前嗰種冷面殺手嘅自信。
好在數據上佢仲交得出 100% 盤帶成功 (1/1) 同贏低 67% 地面對抗 (4/6)，證明個人仲有火、有落力去拼。車路士而家個進攻爛攤子真係灰到震，彭馬喺國家隊攞返少少參與感當係沖喜下，最緊要係無病無痛返倫敦。希望佢快啲開竅，搞掂自己拖泥帶水嘅節奏問題，球隊仲等緊佢去救火㗎。
古斯圖 (Malo Gusto) | 法國 2:1 巴西
⭕️ 上陣時間：89 分鐘 (正選)
⭕️ 成功盤帶：100% (2/2)
⭕️ 長傳準繩度：80% (4/5)
⭕️ 奪回球權 (Recoveries)：4
❌ 地面對抗成功率：45% (5/11)
❌ 傳中準繩度：0% (0/1)
大戰世一翼鋒交足功課，衰收尾當買個教訓
古斯圖今場正選上陣踢到 89 分鐘先被換出，面對住皇馬嘅馬嬲翼鋒雲尼斯素斯絕對係一次大考驗。
雖然數據上地面對抗只得 45% 成功率，但臨場畫面見到佢防守算係相當硬淨。17 分鐘佢成功單防阻止雲尼斯素斯嘅突破，去到 62 分鐘仲有一下關鍵Blocking 擋出對手危險傳中。
進攻端方面佢亦都唔錫身，開局已經頻頻壓上右路助攻，全場交出 100% 盤帶成功同 80% 長傳準確率，展示出唔錯嘅用波能力。不過有讚亦有彈，防守上始終交咗少少學費，78 分鐘正正係佢喺禁區頂侵犯雲尼斯素斯輸罰球，間接造就巴西喺一片混亂中入波破蛋。
祖奧柏度 (João Pedro) | 法國 2:1 巴西
⭕️ 上陣時間：28 分鐘 (後備入替)
⭕️ 奪回球權 (Recoveries)：3
⭕️ 搏得犯規：1 (直接令干拿迪食黃牌)
❌ 傳球成功率：50% (2/4)
❌ 盤帶成功率：33% (1/3)
❌ 地面對抗成功率：43% (3/7)
後備落場未見板斧，最搶鏡係迫人食黃牌果下
喺巴西落後緊嘅 62 分鐘，祖奧柏度入替馬天尼利，試圖幫球隊加強攻力平反敗局。不過佢今場嘅狀態似乎平平，或者係未太適應對法國嘅高強度比賽節奏，落場接近半個鐘只有 16 次觸球，喺前場被重點盯防下，傳波得 4 傳 2 中，引球推進亦屢屢受挫，3 次盤帶得 1 次成功，未能製造出實質嘅入球威脅。
成場波佢最搶鏡嘅一幕，應該就係 72 分鐘憑住突破，逼到法國中堅干拿迪出手阻止而硬食一面黃牌。雖然進攻數據唔算靚仔，連地面對抗都只得 43%，但佢起碼防守端有幫手，交出 3 次奪回球權。作為車迷，國際賽期見到佢後備落場出少少汗、無傷無痛就收貨啦。
山度士 (Andrey Santos) | 法國 2:1 巴西
⭕️ 上陣時間：71 分鐘 (正選)
⭕️ 傳球成功率：90% (27/30)
⭕️ 傳入進攻三區次數 (Passes into final third)：7
⭕️ 失去控球權 (Dispossessed)：0
❌ 觸球次數：36
❌ 被扭過次數 (Dribbled past)：2
正選拍住卡斯米路學嘢，四平八穩但存在感稍弱
今場巴西大戰法國，我哋嘅小將山度士竟然正選上陣，仲要拍住巴西老大哥卡斯米路齊齊鎮守中場。雖然臨場比賽畫面就唔算有太多佢嘅個人特寫，但面對住球星雲集嘅法國隊，可以頂到 71 分鐘先俾丹尼路入替，已經算係完成基本任務。
睇返數據，佢今場踢法明顯以唔犯錯為主。全場交出 90% 嘅高傳球成功率，當中有 7 次成功傳入進攻三區，而且無失去控球權，喺大戰之中做到穩陣派牌，無亂派膠。
但換個角度睇，踢咗大半場中場中，觸球次數只得 36 次，參與度實在偏低，喺場上某程度上隱咗形，似乎喺高強度嘅國際賽仲係有啲拘謹；加上防守端有 2 次俾對手扭過，對抗能力仲有唔少進步空間。
作為中場新仔，有得喺國家隊大戰擔正吸取經驗，已經係賺咗。當係儲吓經驗值，至少唔好傷………真係唔好。
沙亞 (Mamadou Sarr) | 塞內加爾 2:0 秘魯
⭕️ 上陣時間：90 分鐘 (正選)
⭕️ 傳球成功率：96% (89/93)
⭕️ 攔截 (Interceptions)：4
⭕️ 失去控球權 (Dispossessed)：0
❌ 犯規：1 (領黃牌)
化身後防派牌大師………
塞內加爾今場兵不血刃贏 2:0（順帶一提，積臣都有入波，笑死），而我哋嘅沙亞今場踢足全場，報紙直頭寫佢表現係定海神針。佢全場觸球高達 105 次，傳球成功率係 96%（93 傳 89 中），完全掌控咗後場嘅出波同節奏，而且 0 次被奪去控球權，穩陣到不得了。防守端佢亦都唔聲唔聲交出 4 次關鍵攔截，制空權 100% 贏晒。
除咗防守，佢今場仲好有進攻慾望。59 分鐘佢殺上禁區右路起腳，可惜俾對手 Blocked 錯失入波機會。全場唯一美中不足，就係去到 70 分鐘因為一次心急嘅攔截食咗張黃牌。佢喺國家隊展現出嚟嘅強大控傳水準同出波自信，如果可以帶得返去車仔，咁就好啦……
同場加映：積臣 (Nicolas Jackson)
既然講開塞內加爾，就順帶一提積臣啦。佢今場正選上陣踢咗 67 分鐘，最重要係喺 41 分鐘接應隊友傳中，門前近距離執雞得手幫球隊先開紀錄。
數據上佢今場 4 次起腳 3 次中龍 (75% 射門準確率)，空戰贏晒 (2/2)；不過腳下功夫就依然係嗰個熟悉嘅積臣，3 次盤帶過人全部失敗，地面對抗成功率亦得 20% (1/5)。
反正佢今季都係去咗德甲，見佢喺國家隊都有波入保持到腳風，唯有祝佢喺拜仁繼續入波，無論季尾係踢得好等其他球會買斷，定係進化完學成歸來，對車仔嚟講都係百利而無一害嘅。
古古尼亞 (Marc Cucurella) | 西班牙 3:0 塞爾維亞
⭕️ 上陣時間：90 分鐘 (正選)
⭕️ 傳球成功率：95% (71/75)
⭕️ 解圍 (Clearances)：3 (全屬頭槌解圍)
⭕️ 傳入進攻三區次數：3
❌ 地面對抗成功率：50% (1/2)
左路大腦兼護級福將，用身體救全家
大家最愛嘅古古尼亞今場為西班牙踢足 90 分鐘，幫球隊喺壓倒性控球之下輕鬆大勝塞爾維亞 3:0 。佢喺左路可以話係如魚得水，全場觸球高達 86 次，交出極高嘅 95% 傳球成功率 ，完美展現出頂級控傳嘅功架，喺車仔練出嚟嘅派牌能力去到國家隊一樣大派用場。
進攻端方面佢非常活躍，開波 14 分鐘已經同隊友費明喺左路有默契咁短傳配合；去到 75 分鐘，佢接應長傳後，喺左路斬出一個極具威脅嘅半腰波橫越門前，差少少就造就 Munoz 撞入 。
除咗進攻，防守端佢亦交出 3 次頭槌解圍同 3 次奪回球權 。成場波最戲劇性嘅一幕發生喺 51 分鐘，塞爾維亞嘅 Birmancevic 本來車身超靚窩利抽入，但球證吹咗佢起腳前侵犯古古尼亞在先，入球無效，古古成功用身體搏到犯規，化解咗一次失球危機。
西班牙而家備戰世界盃氣勢如虹，被視為奪冠大熱之一 。見到古古尼亞喺左路踢得咁有自信、要攻有攻要守有守，希望佢將呢份國家隊嘅霸氣同冠軍級人馬嘅態勢帶返倫敦，繼續做我哋車路士防線最可靠嘅爆炸頭核心啦。
安素 (Enzo Fernández) | 阿根廷 2:1 毛里塔尼亞
⭕️ 上陣時間：56 分鐘 (正選，入 1 球)
⭕️ 傳球成功率：93% (55/59)
⭕️ 傳入進攻三區次數：9
⭕️ 射門中目標：100% (2/2)
❌ 地面對抗成功率：33% (2/6)
❌ 失去控球權：2
後上殺手本色盡現，早早打卡收工最識做
今場阿根廷對住世界排名 115 嘅毛里塔尼亞，主帥史卡朗尼出咗個半試陣嘅名單，連球王美斯都先列後備。不過我哋嘅一億中場安素就正選擔正，而且好快就做咗主角。開波僅僅 17 分鐘，佢就展現出極佳嘅入楔觸覺，接應 Molina 嘅右路傳中，舒舒服服咁喺禁區內冷靜燙射入網，幫球隊打開紀錄。去到 27 分鐘，佢仲爭啲梅開二度，可惜禁區內嘅推射俾對方門將神勇救出。
數據上睇，佢喺短短 56 分鐘內交出 93% 傳球成功率，仲有高達 9 次傳入進攻三區，完全做足中場派牌大腦嘅本份。雖然地面對抗只有 33% 成功率稍微失色，而且下半場阿根廷場面一度失控俾對手㩒住砌，但好彩安素喺 56 分鐘就已經被換走，完美避開咗尾段嘅大混戰同無謂嘅體能消耗。
對車迷嚟講，國家隊比賽最完美嘅劇本莫過於此：早早入波交足功課，然後踢半場多啲就打卡收工，慳水慳力。希望安素將呢對射門鞋同後上入楔嘅觸覺原封不動帶返車仔，至少下場波唔使食白果先………
卡些度 (Moisés Caicedo) | 摩洛哥 1:1 厄瓜多爾
⭕️ 上陣時間：90 分鐘 (正選)
⭕️ 傳球成功率：90% (44/49)
⭕️ 攔截 (Interceptions)：4
⭕️ 奪回球權 (Recoveries)：6
⭕️ 創造絕佳機會：1
❌ 長傳準繩度：25% (1/4)
國家隊中場鐵人，印證車仔慘況非戰之罪
卡些度今場代表厄瓜多爾踢足 90 分鐘，最終球隊同摩洛哥打成 1:1 平手。作為中場核心，佢今場嘅防守數據依然亮眼，交出 8 次防守貢獻，當中包括 4 次攔截同 6 次奪回球權，落返國家隊一樣交足頂級中場掃蕩嘅功課。
除咗防守，卡些度今場喺進攻端都有貨交。開波 12 分鐘，佢處理死球斬出靚傳中，造就 Gonzalo Plata 頭槌攻門爭啲入波，成功錄得 1 次創造絕佳機會；去到 16 分鐘，佢自己仲喺禁區外起腳遠射，可惜僅僅喺柱邊出界。全場佢被侵犯 3 次，多次幫球隊博到罰球舒緩中場壓力。
雖然長傳成功率 4 傳得 1 中有少少跌 Watt，但無阻佢整體高達 90% 嘅傳球成功率。睇見卡些度喺國家隊依然保持極高嘅競技水平，做車迷真係百感交集。車仔入國際賽期前經歷緊恥辱性嘅 4 連敗，仲要 3 場波食白果，對比返一眾中前場球員喺國家隊嘅生龍活虎，你就明點解我話唔係球員唔得。而家車路士正值風雨飄搖嘅過渡期，只能夠期望卡些度將呢份 Box-to-Box 嘅鐵人活力無穿無爛帶返倫敦，起碼幫手填補下中場個大窿，盡力幫球隊止血啦。
尼圖 (Pedro Neto) | 墨西哥 0:0 葡萄牙
⭕️ 上陣時間：45 分鐘 (後備入替)
⭕️ 傳球成功率：90% (27/30)
⭕️ 盤帶成功率：67% (2/3)
⭕️ 創造絕佳機會：1
❌ 射門中目標：50% (1/2)
❌ 失去控球權：1
火爆半場騷，入替即變焦點球員
葡萄牙作客硬撼墨西哥，最終喺高節奏嘅對抗下互交白卷。今場車路士快馬尼圖喺下半場入替干斯卡奧 ，短短 45 分鐘內就成功搶盡風頭，不過唔係因為入波，而係因為佢同墨西哥球員嘅火爆身體交流。
落場冇幾耐，尼圖就同墨西哥嘅 Jesús Gallardo 發生衝突，雙方甚至有推撞動作，結果齊齊食咗張黃牌。雖然火氣十足，但尼圖喺場上嘅表現依然對辦。佢交出 90% 嘅傳球成功率同 2 次成功盤帶過人。去到 85 分鐘，佢更接應隊友保連奴嘅長傳，可惜喺有機會一錘定音嘅情況下，起腳射門僅僅喺右邊出界，錯失咗絕殺比賽嘅黃金機會。
少少個人感覺…尼圖最近幾場都有少少燥底Feel，雖然唔係話對激情表現反感，但可以收放自如，唔拎牌先係重點。
========================================
Facebook 同 Threads 已經開咗啦！如果鍾意我的文章可以入黎按個讚！
⭕️ 車迷狗up天地 ❌
https://www.facebook.com/profile.php?id=61566593983419
https://www.threads.com/@hkgchedog
鍾意我嘅文章，又有餘力支持我嘅話，記得去我Substack訂閱：
