【球壇風向室】IFAB世盃新球例逐項捉 黑魔法被封印揞嘴爆粗都唔得
燉燈櫈燈 (升Key)，本文只為探討球例，並無特別指向任何球隊與任何戰術，如有感到被冒犯，一切皆為閣下嘅主觀感受，燈櫈燉燈 (降Key)。
頭盔戴好，可以開始內文。25/26球季完咗，世界盃準備開始，作為每 4年一次嘅盛事，FIFA 其實都 Keep 住喺世盃玩花招試新嘢，將d平日放係次級聯賽嘅實驗品放去世盃賽場玩，死球噴霧係咁嚟、VAR係咁嚟、半自動越位判斷係咁嚟 (遲下分分鐘仲會廢除腳毛越位)。
做得好就普及落去，搞得太樣衰就當無存在過。如果你係老波骨，你應該記得 98年世盃試過「加時入波即時死亡」嘅金球制，法國靠呢條例幫佢哋踢走巴拉圭最後捧走冠軍，但同樣因為咁搞到比賽打到後半段無人敢進攻，悶到PK；2004年靜靜雞廢除，FIFA再無提起過。
適逢2026年世盃，FIFA又嘗試新嘢，不過今次……係各種球例嘅小修小補。有啲改動真係無關痛癢，有啲……痛唔痛就要睇你係邊隊球迷。
第一修：死球開出前嘅犯規
今次世界盃一眾新例入面，最多人討論嘅，係呢點：容許介入死球開出前嘅犯規（Fouls before set pieces）。