上年十月，我曾經好有自信咁寫過一篇文，嘗試用理性角度拆解車路士嘅9號魔咒。
當時我嘅論點好簡單：件波衫本身唔識害人，歷代9號嘅失敗全部有跡可尋。有人戰術錯配、有人頂唔順壓力、有人自己撳掣自爆；至於啱啱加盟嘅戴納，熟悉馬蛇、識得同彭馬合作、轉會費亦唔算誇張，睇落正正避開咗前人踩過嘅地雷。
嗯。
然後戴納就用一季時間，向我示範足球點解唔可以齋靠數據預測。啪（打面聲）。
連續傷患、反覆換領隊、角色改完又改，當初列出嚟嘅樂觀理由逐項被現實劃走。我每重睇一次篇舊文，就好似再俾人摑多一巴，塊面腫到而家都仲紅緊。
偏偏就喺呢個時候，車仔官方公布新球季號碼：戴納改著12號，上季著20號嘅祖奧柏度，正式接過9號。
老實講，見到消息嗰刻，我第一個反應唔係「實至名歸」，而係想問：點解要自己主動招惹個魔咒，你當自己係咒術師呀？
經過上年嗰次大型公開處刑，我今次當然無膽再寫「放心啦，JP一定打破魔咒」。但眼前呢個祖奧柏度，同戴納甚至過去嗰班被件波衫吞噬嘅前鋒，真係完全一樣咩？
定係我哋只要望到背脊嗰個「9」字，就已經自動播返同一套恐怖片？
JP係咪而家先成為9號？
要判斷係咪同一系列嘅恐怖片，先問一個問題：祖奧柏度由20號轉著9號，係咪代表佢