【球壇風向室】名帥接班人唔係咁易做 要成功唔止要接得穩仲要改得郁
名帥離開之後，球會最鍾意講嘅一句，通常都係「新時代正式開始」。
但球迷聽到「新時代」三個字，腦入面浮現嘅往往唔係陽光、希望同全新一頁，而係莫耶斯坐喺奧脫福教練席上面嗰副「米一久釀」嘅表情。
咪誤會，今篇文唔係針對曼迷，我係話在座各位都係………講笑。
費格遜之後有莫耶斯；雲加之後有艾馬利；高普將一支幾乎完整嘅利物浦交到史諾手上，第一季順利捧盃，第二季卻突然變成另一個故事。就連車路士第一次送走摩連奴之後，格蘭帶隊殺入歐聯決賽、聯賽鬥到最後一輪，結果都只夠換來一張大信封。
名帥留下嘅標準，有時高到第二名都可以被當成失敗。咁佢哋留低嘅究竟係一份豐厚遺產，定係一份包裝得好靚、打開卻飄出紫色煙嘅毒藥？
如今哥迪奧拿終於離開曼城，教練席上亦坐住那個男人。基於本人作為車迷嘅基本禮貌，本文唔會直呼其名。
至於佢接過嘅係一部仍然可以自動運轉嘅冠軍機器，定係一個拆開外殼就無人識得重新組裝嘅黑盒，暫時無人知道。真正值得問嘅，亦唔係「點解繼任者總會失敗」，而係一個人要做到啲乜，先算真正接得住名帥留下嘅時代？
接得穩，已經唔容易
不過，正式講任何嘢之前都要戴返頂頭盔。足球歷史咁長，只要有人提出一條定律，留言區總會有人由百幾年嘅資料庫掘返一個反例，再用一句「咁某某又點計？」完成絕殺。
所以，今篇文唔係要成立一條「前任執教超過十年，繼任者必然失敗」嘅足球物理定律。但「特別難接」呢個現象，的確唔完全係球迷錯覺。
《Guardian》喺2013年曾經引述經濟學家John Goddard嘅研究，整理英格蘭
