【Re: Re: 球探報告】摩根羅渣士第三次重審 球員改判但£117m張單有罪
兩個月前，我先寫完一篇【Re: 球探報告】，重新審視摩根羅渣士。當時我承認自己低估咗佢嘅進步，但轉會判決仍然維持原判：傳球唔穩、位置同彭馬重疊，車路士連領隊同踢法都未定，用£70m至£80m買佢完全講唔通兼On9。
文章最後，我仲好口臭咁寫：「除非彭馬扭計，死都要高層買個英格蘭國家隊FD子返嚟陪佢踢波。」
結果兩個月後，車路士真係用£117m簽咗佢，仲講明會踢左翼正選，與彭馬並肩作戰。
嗯。
啪啪啪啪啪啪啪啪啪啪。（瘋狂打面嘅聲音）
如果第一篇係初審、第二篇係上訴，咁BlueCo今次就係拎住一億一千七百萬鎊衝入法庭，要求案件發還重審。更麻煩嘅係，當日我提出嘅「邊個教、踢咩、企邊」，而家真係有晒答案。沙比阿朗素親自打電話、講解戰術計劃，連左翼個位都預先留埋俾佢。
新證據擺到上枱，再為咗面死撐就無意思。今次唯有第三次開庭，睇下係我判錯案，定係BlueCo買咗張全世界最貴嘅上訴狀。
判完之後，發生咗啲乜？
傳聞阿仙奴追咗羅渣士超過一年，已經同球員深入接觸，準備正式向維拉出價；但車路士突然殺入，沙比親自落場說客，高層亦直接拎住£117m要求成交。
Romano形容呢次係「Pre-hijack」。阿仙奴連正式出價都未嚟得切，車路士已經連人帶枱成張搬走。
所以今次唔係減價清貨，亦唔係BlueCo順手執雞。車路士明知佢貴、明知有人爭，仍然將佢視為沙比上任後嘅核心收購。
問題係：沙比究竟睇到啲乜，我之前睇唔到？
世盃無證明佢係左翼，反而證明我睇窄咗佢
雖然車路士話會將羅渣士擺喺左翼，但英格蘭喺世盃根本