【球探報告】連有睇青訓嘅我都走漏眼 16歲MNJ憑咩入阿朗素法眼？
我知，你實會問：「乜撚嘢MNJ呀…」
我自問有留意車路士青訓。大力、米希卡、禾殊、麥昆、拉比積，近年冒起嗰批細路我唔敢話熟到背得出身高體重，但至少見到個名，腦入面大概有張相。
但當阿朗素將16歲嘅Mahdi Nicoll-Jazuli帶入一隊，再帶埋佢去澳洲季前集訓，我第一個反應仍然係：「邊個嚟？」講明，今次堅係唔識發音，亦唔識譯，所以叫住MNJ先。
老老實實，呢句對一個成日扮青訓專家嘅Page主嚟講有少少失禮。但我無辦法扮一早識佢，更加唔想睇完幾段精華，就突然話自己由U9睇住佢大。
更有趣係，阿朗素帶佢去到悉尼之後，先知道呢個細路正正喺當地出生。即係今次唔係市場部發現澳洲故事，特登安排一場「青訓衣錦還鄉」；而係阿朗素先睇中個球員，後知後覺先發現自己帶咗個悉尼仔返鄉下。
咁到底係我走漏眼，定係MNJ本身就係一種唔容易喺入球精華出現，但特別容易令教練心動嘅球員？今日傍晚如果佢真係喺出生城市完成非正式一隊地標戰，至少我哋要先搞清楚：呢個突然被阿朗素擺上枱嘅16歲中場，究竟咩料。
當係臨急抱佛腳，一齊睇下呢篇球探報告。
唔係突然彈出嚟，只係無乜人留意
MNJ上季各級賽事合計上陣33場，當中30場正選，累積超過2,500分鐘。上陣量絕對唔少，但大部分時間都留喺U18，數據亦只得2球6助攻。
同一批青訓，大力有入球有盤扭，米希卡有身體同射術，禾殊一早跳級踢U21又上一隊，麥昆又快又過到人，拉比積仲有少少美斯味。MNJ偏偏無一項適合剪成十幾秒精華放上YouTube，曝光自然少一截。如果你主要追U21、入球片同一隊後備名單，好容易成季都同佢擦身而過。（好似我咁，笑死）
但由教練角度睇，佢嘅升級速度其實相當誇張。MNJ 15歲已經