(會員限定)【U21追蹤檔案：1月篇】冬日震盪後嘅生存遊戲 無效控球與新帥嘅極端實驗
嗱，今個月呢篇準時出到俾大家，唔好投訴啦。
-------------------------------------------------
2026 年嘅 1 月，車路士上下連抖啖氣嘅時間都無。一隊經歷換帥大地震，羅生走馬上任接手火棒，第一件事就係將 U21 主帥 Calum McFarlane 上調做一隊教練團救火。
一隊亂局嘅連鎖反應，令新帥 Harry Hudson 臨危受命接掌 U21，對呢班啱啱考完 12 月期末考 (真係考試) 嘅細路嚟講，1 月份根本唔係咩準備接班嘅表現舞台，而係一場真正嘅求生訓練。
今個月 6 場比賽，U21戰績就好似坐過山車甩咗安全帶一樣：可以 4：1、4：2 㩒住水晶宮同修咸頓嚟打，又可以被韋斯咸 5：0 血洗，喺英超國際盃被賓菲加狂炒 2-6。
Hudson 上任之後試行羅生嘅「極端控球」戰術，呢班葛咸青訓小將時而踢出巴塞式嘅水銀瀉地，時而喺高壓反擊下防線自爆得體無完膚。
與其話今個月睇到青訓統治力，不如話我哋睇到嘅，係失去一隊防波堤保護後，年輕球員喺殘酷現實中如何於混亂中生存。