(會員限定)【U21追蹤檔案：2月篇】歐洲夢碎與一隊空降 U21戰術問題同一隊居然勁相似
去到 3 月尾先趕得切出 2 月嘅總結，真係要同大家講聲Sorry。車路士最近亂到七彩，淨係消化一隊羅生接火棒後嘅各種大地震同新聞，就已經打亂晒我嘅出文節奏，不過，遲到好過無到，仍然係3月內出到文俾大家。
2 月份葛咸訓練場嘅賽程其實唔算密，總共得 4 場波（兩場 U21 聯賽、兩場 U19 歐青聯），但入面嘅資訊量真係大到癲。
我哋見證住 10 人應戰下互射十二碼嘅熱血，又睇住球隊領先兩球下防線再次自爆嘅老毛病；甚至有「一隊大佬」拉維亞傷癒復出，空降 U21 試陣做降維打擊。(我估果場波唔少巴打有同我一齊睇)
不過最痛嘅，肯定係我哋嘅歐洲之旅喺馬德里正式畫上句號 。呢個月，無人會同你講咩「準備好接班」，因為對住皇馬嗰場敗仗，現實狠狠咁摑咗大家一巴，話俾我哋知：由葛咸步向歐洲頂級，中間仲有一度好遠嘅距離。喺 Hudson 嘅極端控球體系下，班細路有順風局嘅蜜月期，亦有逆風局嘅崩盤。廢話少講，即刻睇吓呢個殘酷與熱血交織嘅 2 月份成績結算。
數字速覽
31 vs 19： 對布力般流浪一役，車仔 U21 瘋狂起腳 31 次，喺對方禁區觸球高達 70 次，順利大勝 5-0；但對列斯聯嗰場，即使同樣有 19 次射門優勢，卻因為錯失咗 2 個絕對入球機會 (Big chances missed) 而被逼和 2-2。